NUK DO TË DUHEJ

Historia e afërt dhe e largët e jona nuk do të duhej të pengojë shqiptarin të jetë mysliman, katolik, ortodoks etj. sipas bindjeve e dëshirës së tij. Shqiptari nuk ka nevojë të ndërroj asgjë nga e kaluara për të qenë fetar i cilësdo fe. Stadet e zhvillimit të shoqërive janë ashtu siç ishin dhe po t'i ndryshojmë nuk na bëjnë fetar më të devotshëm e më të mirë. Përkundrazi tendenca për të ndryshuar historinë tënde janë mesazh për asimilim e faqja zezë, janë propagandë e të fortëve, e të pasurve për interesat e tyre afatgjata thirrur në lirinë e fjalës, përparimit, të së drejtës historike të sajuar, miteve, forcës ekonomike, fesë etj. Ne shqiptarët jemi kështu siç jemi me shumë fe dhe duhet pranuar realitetin. Nuk do të duhej shpikur teori e të paqena për të treguar se cili jemi më të mirë. Të mirat e të këqijat tregohen me punë, vepra, përkushtim ndaj Zotit, njeriut, kombit e gjuhës së nënës dhe jo me llafe e ndërkëmbëza për njëri-tjetrin. Thirrjet në stilin; ne ishim mysliman para ardhjes së turqve ose ishim të krishterë që herët, duke kërkuar favore nuk qëndrojnë. Si do të tingëllonte sikur ateistët të thirrën në periudhën para ardhjes së fesë dhe të thonë; ne ishim të parët. Stërkeqjet, teoritë, tendencat, që prekin gjuhën, kulturën, historinë e gjeografinë tonë shqiptare të lashtë qëkur mbiu lisi, një sahat e më parë duhet të ndalohen me të gjitha mekanizmat që i ka shteti. 

Sabit Abdyli
Botuar ne gazeten "Bota sot", 30.07.2017

CIKEL POEZISH TE SHKRUARA 2016 -2017-

                                                                                   

PIKON
Pikon kulm i shtëpisë
Pikon
Hafije e ustallarë nga gjitha anët vijnë
Thirr e pa thirr
Kush ndreq kush prish
Tanët mjaftohen të jenë në krye të vendit
Të mos lagën
Gushë për gushë  me qoftëlargun
 E lëshojnë udhë
                           Korrik, 2017

ZË KOHE
(Haxhi Muhaxherit)
Jehonë kohësh të mira
Emrash rrënjësh e qëndrese
Furtunash e motesh lavdie
Nuk resht së vrari të keqën
Nuk resht së qëndisur fjalëmirët
E fjalës shqipe
Auckland, korrik 2017

PAK  MË PARË
Eca bregut detit
Mes  kohës në ikje dhe kohës në ardhje
Valës së shkumëzuar dhe stërkalave
Që era e hapërdanë mbi gurët ndanë
Fillimvjeshtë  në Ishull fillimpranvere Atje
Me fletët që bien me borën që shkrinë
Me dimrin në ardhje me verën në prag
Loz me stinët kujtimet  mallin
Buzëqeshur  buzëvaj
                     Mars 2017
MUR MBI URË
Në bisht ndër shalë
Ikën
U kthyen dhe mbyllën urën me drurë e gurë
Me lutjet e Evropës hoqën barrikadat
Çajnë dërrasa
Biçim vazo betoni ngrehen mbi urë
Hedhin  pluhur syve bëjnë petulla në ujë
Me urë e pa urë
Mur mbi urë
Skërmiten qençe e bëjnë zhurmë
Sa me lindje sa me perëndim
Sorrë në dy hunj
Janar, 2017
IN MEMORIAM PËR SHKRIMTARIN R. KELMENDI
"Letrat prej Ulqini" me Ty takim im i parë
Aty mësova sa fort fishkëllen fjala shqip
Dhembjen ta zbulova te "Rrëfimi i njeriut me samar"
Me mësimet tua te Verrat e Llukës u morën ngryk
Gjithë ai nam
Te opusi yt letrar shijova të bukuren humorin me karar
Saktë e dije kur kositen livadhet dhe kur do të duhej
Të kërcasin e heshtin arm't
Auckland, 12 janar 2017

KROI I FSHATIT
Rrënjësh gërshetuara drurëve mali,
murmurit i kristaltë uji akullt.
Në mes vapës në ballë të pikë.
Barishtet valltare tunden gëzuar,
parfumojnë rogën e harlisur gjithandej.
Këngë e trishtilave  n' degë,
deh e prek në shpirt!
Dhjetor 2016


NËNA RABË
Për dritë të gazishtës
Thurte çorapë
Ngrohte mëngjeset e ftohta
Dhembjen e njomte si lulet
Jetën
Fjalën
E qëndiste me ar
Gusht 2016

MËSUAR
Rrëzojnë diktaturën.
Derdhin në bronz  një të njëjtë me bujë
dhe vazhdojnë jetën si më parë
në diktaturë!
Gusht 2016

BIOGRAFI II
Në krye të herës, fjala e prangosur.
Pranë oxhakut mbrëmjeve,
për toke shtrinim baloza e krajl!
Freski mëngjesi mërdhinte këmbët zbathur.
Me gishta të vegjël,
xhamave të avullt ushtronim bukurshkrim.
Kur vinte korriku
Zinim xixëllonja, i venim në ballë.
Grunajave dielli i buzëqeshur,
cicërima jete, për bukën e bardhë!
Qershor, 2016

BREGUT
Zhurmon vala
Tek përplaset shkëmbit
Shkumëzon shkumën thinjoshe
Bregut ec unë
Pulëbardhat tutje tehu fluturojnë
Njëra ndahet e më ndjek pas
Eja sikur më thotë plot gaz
Ta shuajmë mallin bashkë
Dhe era luan me flokun tim zbardhur
Rërë e nxehtë nën këmbë
Më djeg e nuk më ngroh
Korrik, 2016

NJËHERË E MIRË
 Yjet zënë me shtëllunga të zeza  resh
Shtigjesh bjeshkësh më në fund erdh Dielli
Rrëmujë e ngazëllime mëngjesi
Qentë  qençe lehin Diellin
 Azdisen në kohë lirie
Poeti vazhdon  rrëfimin për ujkun
Dhe byryten  mëzetërit që  kullosin livadhet
 E zëna me tre plisa dheu mbi mezhde
Ende  në kërkim të  ilaçit për të vrarë
Mizat bezdisëse njëherë e mirë
                       Korrik, 2016

ATË DITË KUR PO NISESHA USHTAR
           (25 gusht 1970)
Nëna nga bunari nxori një kove ujë.
Piva një gërrqe se kështu ishte adet.
Shtrëngim duarsh, përqafime,
doja të mbahem burrë, loti më tradhton.
T’i shpëtosh të keqes, më thanë, sa më pak fjalë!
Me të ligun mos ngul kunja,
dosjet janë të hapura për shqiptarë!
Ne vetëm numra jemi,
mos beso kur të rrahin krahëve!
Në listat: “Të rrezikshëm për shtetin”
emrat tanë deri më një të sistemuar i kanë!
                  Nëntor, 2014

PRURJE KOHE
Shpirtshiturit, çirren podiumeve
Mohojnë vetën
Kanë korruptuar zyrtaret
Dhe shesin dhjam për mish
Korrik, 2016

KU MBETI
Ku mbet moti kristal
Oxhakut tymi i shkonte drejt
Qëndisej me ar fjala e jeta plot harmoni
Ku mbeti fjala e thënë në sy
Kohë gjithçka prapa krahëve erdhi
Veshur me pendla të bardha mjellme
Brenda sterrë i zi
Ku mbeti autoritet i prindit
Shtetit
Shkollës
Familjes
Çiltëri e djalit vajzës
Fjala fjalë
Emrat shqip
Ku
Dhjetor, 2015

ITAKA
Josh gjithçkaje e saj
Shtegtarët me ditë e natë krahëve u japin
Hijeshi e sirenave e tmerr katallanësh nuk i ndal
Rendje mes shkretëtirave e resh
Aromë e vatrës ndjellë e thërret
Në zhgjëndërr e ëndërr shfaqet
Si këngë bilbili në rremb
Qershor, 2016

FJALË E FJALË
Në takime mërgimtarësh.
Secili ka një mendim.
Dy.
Tre.
Shumë.
Grijmë ujë në havan.
Komentojmë libra e tituj gazetash pa i lexuar,
Gjykojmë problemet madhore të shtetit, pa qenë atje!
Botën ujdisim,
Më mirë se perënditë ...
Shajmë diku të irrituar .
" Po të ishim ne, do të bëhej më mirë " !
Flasim si ekspertë,
Të shkolluar kushedi nga cila galaktikë.
Flasim me radhë  pa e dëgjuar sho-shoqin.
Secili shtyhet  të shkrep, qoftë  edhe një fjalë.
                                   Maj, 2016

NDRYSHIM I MADH
Kam mall,
dhe  kujtoj motet,
kur brehej hekuri me dhëmb
dhe vdisje për Flamur.
Për të lexuar Fishtën, Konicën, Kadare,
Ernestin, Markezin ..
krijohej radhë.
       Maj, 2016

EULEX
Me një të shkelur të syrit
Tanëve në pushtet
Flamurin na dizajnuan
si deshën vetë
Himnin pa tekst
Na presin rrobat
Herë shkurt herë  gjate
Tamam asnjëherë
               Maj, 2016

MENDËSI
Bajraktarizmi  mendësi e jonë
Ajka në shpinë të popullit
Loz lojën kaloras
Mbrapshtitë në rritje
E mbara e mira
Ende larg
Mars, 2016

EMIGRANT
Emigrant shkak luftë ngjyrash
Të tillë dikur pati edhe në fshatin tim
Të përndjekur  nga e kuqja
Shtigjeve pafund në rrugëtim
Përtej oqeaneve mbërrin
I gjeta të plakur buzën shkrumb
Unë emigranti muhaxhir.
Në prag shekulli njëzetenjë
Dëgjuar keni nga gjyshërit
Për plagën e vjetër emigrant politik
Karvan në ecje lodhur
Me kujtimet plumb mbi kurriz
                                 Mars, 2016
TESHTITJE KOHE
Gjithçkaje i doli boja
Karriget u përlloçën si është më keq
 Filiza të së resë në ketë palcë acari të vijnë
Të ngjallin shpresat e humbura nga lakmitë
Të kapërcejmë inatet vetën
Dhe jugë e bardhë të fryjë
                     Mars, 2016

 VENDÇE
Ecje mbi ferra  e shkurre nëpër mote
Për jetën
Për diell më shumë
Dhe dalin nëngurët
Vjelin  frutat e pemëve
Kafshojnë diellin  pamëshirë
                    Mars, 2016


KËNGË E PARË
Këngë  zemre
Buqetë
Ëmbëlsi
Panel në dorë të piktorit
Gëzim
Mall
Gur në qafë
Djep ëndrrash
ATDHEU germa e parë
           Auckland, mars 2016

SHTERPËRI  E GJELAVE
Gjelat kryengritës të mëngjeseve
I dehu fitorja
Nga pangopësia vetëlavdërimet
U ngjirën  
Për të qëndruar majë mullari
U qullën e qullën si është më zi
Shkurt, 2016

MBASE
Donzhuanët  kolonizuan shën Valentinin
Për të treguar besnikëri
Përmes dhuratave e luleve
Blerë dashuri
Mashtruar e fshehur kurvëritë
Shkurt, 2016

GJUHA SHQIPE
Në Gadishullin Ilirik
Në krye të motit
Farë e fjalë e parë
Këngë zogjsh
Rreze
Dritë e ylbertë
Rrënjë
Shqip e bërë ugar
Nga trung i saj në shekuj
Lindën e u rritën edhe tjera gjuhë
Shkurt, 2016

“ANKTHI I PRANVERËS ’99”

Shkruan: Isak A H M E T I

Pak vite pas Luftës së Kosovës(1999), përkatësisht me 2004, Sabit Abdyli nga Kabashi i Vitisë (i Anamoravës), aktualisht rezident në qytetin e Aucklandit (Zelandë të Re), ka botuar veprën e tij publicistike të radhës me titull: ANKTHI I PRANVERËS ’99. Është kjo një vepër e zhanrit publicistik e shkruar, me dije dhe përkushtim, në formë të ditarit. Siç e kemi thënë edhe në një rast tjetër, Sabit Abdyli, ndonëse tash profesor në pension, nuk ka të ndalur së vepruari dhe shkruari në fushën e letrave shqipe, ai vazhdon të shkruajë dhe botojë herë pas here libra, poezi, prozë, letra, anekdota, etj., që janë të vlere dhe rëndësie të veçantë. Vlen të theksohet se ai, që nga vendosja në Ishullin e largët (29 tetor 1999), përveç me shkrime dhe botime në fushën e letrave shqipe:
– Kabashi i Anamoravës, (monografi)
– Ankthi i pranverës ’99 (libër -dokumentar)
– Kohë e lumtur, poezi,
– Bijtë e shqipës në tokën e reve të bardha, prozë, poezi dhe artikuj për Mergatën në Zekandën e Re
– Na Kabashi jem t’ndam nji zjarrmi,etj.), është shumë aktiv edhe në organizimin e aktiviteteve artistike ndërthurur edhe me veprimtari për ruajtjen e unitetit, gjuhës dhe traditës kombëtare në mesin e Mërgatës shqiptare në Zelandë të Re.
“ANKTHI I PRANVERËS’99”
Libri”ANKTHI I PRANVERËS’99” – libër publicistik, ditar lufte, i shkruar me dije dhe përkushtim shumë të veçantë, është strukturuar në gjashtë kapituj, si vijon:
KAPITULLI I
– Zezona
– Lufta
– Pranvera e ankthit
– Dëshmi
– “Evropa e rrëzueme,e pusueme”
KAPITULLI II
– Në mes të dy kufinjëve të dhunshëm
– Në Shkup
KAPITULLI III
– Dëshmi të tjera
– Fshati Skifteraj
– Fshati Lugishtë
– Fshati Smirë
– Fshati Sadovinë e Jerlive
– Fshati Mollëkuq
– Fshati Urban
– Qyteza e Vitisë
KAPITULLI IV
– Vdekja e terrorit dhe ardhja e NATO-s
– Kthimi i madh
– Fundi i zezonës
KAPITULLI V
– Kronologji e ngjarjeve: 1999
KAPITULLI VI
– Faqe jete, jetë e bukur(Në vend të biografisë).
Ky libër i autorit në fjalë, siç e ka vënë në dukje edhe recensenti, Fehmi Ajvazi, është dëshmi për kohën dhe brezat(fq.68). Ky autor, tashmë me një përvojë të gjatë jetësore dhe letrare, është jo vetëm një përjetues por edhe një mëtues që është përpjekur personalisht të zbardhë pjesë të procesit tonë kombëtar, siç janë”muajt e Kosovës” ose “bombardimet 78 ditëshe të NATO-s. Si një personazh i gjallë i kohës, autori në fjalë, më këtë libër (me vlera të padiskutueshme), i ka dhënë opinionit tonë një dëshmi të rrallë për kohën…
Duke e lexuar librin në fjalë, që shihet edhe në përmbajtjen e paraqitur të tij, në e kuptojmë të kakuarën tonë, jo të largët, ndryshe: dhembshëm gjithsesi, por siç e thotë edhe recensenti, Fehmi Ajvazi, si një testament i cili zbërthehet për ne, si dhe për brezat që vijnë.Libri në fjalë, tepër i pakët për procesin në fjalë, është një kontribut i çmueshëm dokumentar – publicistik për labirinthet e dhembshme, disa herë tragjike por edhe heroike nëpër të cilat kemi kaluar jo vetëm si individ, por si shoqëri dhe popull. Fatkeqësisht, sipas autorit, del se ende nuk kemi nxjerrë mësimet e mjaftueshme që i shpalosin proceset, edhe procesi si ky i pranverës së ethëshme dhe të përgjakshme 1999.
Përndryshe librin në fjalë e karakterizon gjuha e bukur, e rrjedhshme, artistike, rrëfimi i gjallë i ngjarjeve që të lënë pa frymë…