Cikël poezish marr nga libri “Kaq mall”

Sabit Abdyli

IMAZH

Në flladin e stinës së Re

pa kthyer kryet mbrapa

i rashë kryq e tërthor Qytezës

Te Lendinë e Vogël...

buzëmbrëmjes  vrapova

kohë e korrjeve

xixëllonja asnjë për be

Në Lisnishtë varret

gur në zemër

dy gurë kam pa ngrit'

Nëna në parmak të shkallëve

shtegu i ballit vrenjtur:

“qëkur zogjtë morën  udhën

dielli i pranverës Mirë

akull i ftohtë”

FJALA

Edhe nëpër zjarr të ferrit

do të shkel.
Në kërkim të fjalës fjalë, 

 njeriut njeri.

Pasionet situr në sitë të hollë.

Bredh rrugëve të botës;

dallgëve  të kohës,

për dy gisht fytyrë ec nëpër zjarr,

nuk epem dhe fjalë nuk shkel!

 Janar, 2014

PËRTËRITJE E LEGJENDËS

Blozën ia hoqi kujtimit

Kullave pluhurin e dhembjes

Urave  kalimtarët

Vatrës zjarrit që përcëllon

Drita e një legjende

                           1989

DËSHIRË

Do të doja  të jesh qiell, 
dielli që ngrohë freskon.

Erë pranvere në vapë vere,

me hije dreke matur

mall pa hile,

më këmbë në tokë të jesh,

mendjen si kallinj gruri plotë

ta kesh!

Janar, 2014

KËNGË

Këngë e lashtësisë.

Ardhur me lashtësinë.

Flasim nën gjuhen e mëmës

Dhe qajmë të pafaj.

                    Nëntor, 2013

GASTARBAJTER

Si shpendë shtegtarë

Ikni me mall

Shtëpi keni rrugën

Udhëkryq keni jetën

Ju zogj të qiellit blu

Me mallin e kaltër të qiellit

Me sytë e përlotur             

                      1989

TË NJË KULAÇI
Në Durrës restorant "Gostivari".
Debat i nxehtë!
Kush është Shqipëria, kush është Kosova ?
Për ketë dëshmitare kam Antoninen.
Diskutuam për të përfunduar:
Thërrmijë të një kulaçi pjekur në zjarr e hi
Të një vatre

Të një oxhaku jemi

Durrës, 29 gusht 2013

PORTERT NJERËZISH TË MUNGUAR

Asnjë herë nuk harron emrin

Në gurrën e tij etjen shuan

Nuk shtiret

Nuk shitet

Nuk blihet

Nuk di kleçka  ç’është

Cicërimë  e zogut e shqetëson

Me zemër  flet e dashuron

            Auckland, korrik 2011

               NËNËMADHJA

Si shtëllungë leshi në furkë

të tashmen tjerrë

një nga një kujtimet

në bosht mbledh e dredh

 end qilima kuq e zi

të dorës së parë

me këngë aromë ftoi e molle

përkund e rritë ardhmërinë

nënë

nënëmadhe

 e tokës së lashtë

              Auckland,  27 janar 2013

DARDANINË  ZONJË

(I.R)

Në  barakë druri të premteve

alarmoi botën

i  dashuruar pas lirisë

thjeshtë  pa fjalë të mëdha

as një sharje armikut

 i ftohtë akull me kundërshtarë

projektoi rrugën e kombit

dinte çka donte

Dardaninë zonjë

as nuk vërsulej as nuk u zmbrapsej

Fjalën e fundit se thoshte të parë

ecte sigurt me te njëjta kërkesa

me të njëjta fjalë

I dashuruar pas lirisë

as njëherë nuk  u thye

                            janar 2012

ALI PODRIMJES

Vargu i tij

etjen i shuan tokës
deri te Mollë e Kuqe
 e përtej saj
 latoi gurë shtigjesh e urash Dardanisë
 ligjëroi si hisja të mos na shuhet

 e shkoi mbas Lumit tij

  22 korrik 2012

Qershori

(E. Abdylit)

Tokën stërgjyshore

E njome me djersë

Lulet trajtove si nëna fëmijën

Pemë shartove

Tridhjetë e pesë vjet

Degët e përdegura mbrapsht

I lidhe në një trung

O burrë 

              Gusht 1992

TË JESH

Të jesh njeri:

pas çdo ndërrim moti

regjimesh,

ta shikosh sy në sy të kaluarën,

pa pasur nevojë,

shikimin ta mbash ulur

as ndryshosh lëkurën.

Të jesh njeri:

sy në sy të shikosh,

të tashmen të kaluarën!

                        Prill, 2014